Uchambuzi wa Waamuzi 14 — Samsoni: Nguvu, Tamaa na Simba Njiani
- Pr Enos Mwakalindile
- Nov 25
- 12 min read
Wakati nguvu zinatembea pamoja na tamaa, kila njia panda inakuwa mtihani wa wito.
1.0 Utangulizi — Simba Kwenye Njia Panda za Tamaa
Sura ya 14 ya Waamuzi inaanza na hatua zinazoshuka mteremko.
Yule mtoto aliyeahidiwa kupitia moto na mwali sasa amekua. Roho wa Bwana ameanza kumsukuma huko kati ya Sora na Eshtaoli (Waam 13:24–25). Huyu Mnadhiri tangu tumboni sasa "anashuka" kwenda Timna—kwenda nchi ya Wafilisti, kwenye uhusiano ambao utachanganya wito wa Mungu na matamanio yake, kazi ya Roho na tamaa za moyo, wokovu na maafa (Waam 14:1).
Njiani simba ataunguruma, siri itazaliwa, kitendawili kitasimuliwa na ndoa itavunjika hata kabla haijaota mizizi. Nguvu za Samsoni zitaonekana kama radi; lakini tamaa zake zitamvuta kama wimbi la bahari. Mungu atamtumia kumpiga Filisti, lakini namna anavyoishi itatutafakarisha swali gumu: Nini hutokea Roho wa Bwana anapomjia mtu, lakini ataenenda kwa kutegemea macho yake kuliko imani? (taz. Block, Judges, Ruth, 385–88).
Waamuzi 13 ilituonyesha neema ya mwanzo—mwanamke tasa akitembelewa, Mnadhiri akiahidiwa, nyumba ndogo ikigeuka kuwa madhabahu ya moto (Waam 13:2–25; Block, Judges, Ruth, 401–7). Sura ya 14 inaonyesha jinsi neema hiyo inavyoanza kupitia mtihani mara tu nguvu zinapokosa kufungwa na utii. Yule aliyewekwa wakfu kwa Mungu anaingia moja kwa moja mikononi mwa wanaowatawala watu wa Mungu.
Sura hii inatualika tujishughulishe na maswali mazito:
Inawezekanaje jambo liwe "kutoka kwa Bwana" na wakati huohuo lichanganywe na tamaa za kibinadamu (Waam 14:4)?
Inaonekanaje pale ambapo kutakaswa au kuwekwa wakfu kunadhoofika, siyo kwa kuanguka ghafla na kwa namna kubwa, bali kwa hatua ndogo ndogo tu?
Kama vile kujipitisha kwenye mizabibu (ambayo Mnaadhiri hakuruhusiwa kugusa), kugusa mifupa au mizoga kwa siri, au kujifurahisha katika kalamu bila uangalifu? (Hesabu 6:1–8).?
Mungu anafanya kazi vipi kupitia mtu ambaye karama zake zimetangulia kupevuka kuliko tabia yake?
Kabla hatujakimbilia kumhukumu Samsoni, maandiko yanatuonesha kioo.
Kauli yake, 'Yeye amenipendeza mimi' au 'Ananifaa mimi' (akimaanisha mwanamke), inasikika karibu sana na lile tamati la kitabu chote: 'Kila mtu alitenda yaliyomfaa yeye mwenyewe' (Waamuzi 14:3; 21:25).
Yaani, katika maisha ya Samsoni—aliyekuwa na nguvu na aliyekuwa na haraka ya kufanya mambo—ndipo historia nzima ya taifa zima la Israeli ilipokusanywa na kuonekana. Kabla hatujamhukumu Samsoni, maandiko yanatusamishia kioo tujitazame. (Webb, Book of Judges, 196–200).
2.0 Muktadha wa Kihistoria na Kiusimulizi — Kutoka Tumboni kwa Mnadhiri hadi Karamu ya Wafilisti
2.1 Kutoka Kusukumwa na Roho hadi Kushuka Mteremko
Sura ya 13 iliisha kwa tumaini: Samsoni alizaliwa, akabarikiwa, na Roho wa Bwana akaanza kumsukuma katika kambi ya Dani (Waam 13:24–25). Sura ya 14 inaanza na hatua hii: "Samsoni akashuka mpaka Timna" (Waam 14:1). Kurudiwa rudia kwa "kushuka" (14:1, 5, 7, 10, 19) si ramani tu ya eneo, bali ishara ya kushuka kiroho. Mnadhiri anashuka kuingia eneo la Wafilisti, na pamoja naye wito wa Israeli unaonekana kuwa dhaifu (Block, Judges, Ruth, 417–18).
Samsoni ndiye mwamuzi mkubwa wa mwisho, na simulizi yake inachukua sura nne (13–16). Hapa sura ya 14 tunaona kwa mara ya kwanza jinsi wito wake unavyoanza kuonekana hadharani, katikati ya mvutano wa kusudi la Mungu na matamanio yake binafsi. Kama Webb anavyosema, Samsoni ni kama "Israeli mmoja"—anayebeba ndani ya maisha yake yote, wito wa Roho na pia kujiachilia kwa anasa zile zile za taifa lake (Webb, Book of Judges, 196–201).
2.2 Timna, Wafilisti na Mnadhiri Kwenye Karamu
Timna iko mipakani, kati ya eneo la Israeli na la Wafilisti. "Kushuka Timna" ni kuingia kwenye eneo linalodhibitiwa na adui, kwenye hali ya utambulisho uliochanganyikana. Wafilisti, watu wa baharini waliokaa pwani, walikuwa na teknolojia ya juu na mamlaka ya kisiasa; utawala wao juu ya Israeli uliendelea hadi siku za Samweli na Sauli (Waam 13:1; 1 Sam 4–7; Block, Judges, Ruth, 399–401).
Tamaa ya Samsoni kwa msichana wa Kifilisti kutoka Timna inaonyesha jinsi mipaka ilivyoanza kufutika. Israeli waliitwa kuwa tofauti na mataifa, hasa katika ibada na ndoa (Kum 7:1–6), lakini hapa Mnadhiri shujaa anavutwa si na utukufu wa Bwana bali na kile kinachomvutia macho yake (Waam 14:3; Wilcock, Message of Judges, 135–37).
Tunapata pia neno mišteh—karamu ya mvinyo (Waam 14:10). Kuona Mnadhiri, ambaye nadhiri yake ilihusisha kutokunywa divai (Hes 6:1–4), yuko katikati ya karamu ya aina hiyo ni jambo linalotuchanganya. Hata kama hatuambiwi moja kwa moja kama alikunywa, mazingira yenyewe yanaonyesha msuguano kati ya wito wake mtakatifu na maisha yake ya kijamii (Block, Judges, Ruth, 424–25).
2.3 Muundo wa Simulizi — Tamaa, Simba, Asali na Kitendawili
Kwa upande wa simulizi, Waamuzi 14 imepangwa katika sehemu nne:
Tamaa na Upinzani wa Wazazi (14:1–4) – Samsoni anaona, anatamani, na anasisitiza amuoe Msichana wa Kifilisti; wazazi wanapinga; msimulizi anaongeza kwa upole, "jambo hilo lilitoka kwa Bwana".
Simba na Asali (14:5–9) – Njiani kwenda Timna, mwana-simba anamvamia; Roho wa Bwana anamjia kwa nguvu; anamrarua simba; baadaye anapata asali ndani ya mzoga na kula.
Karamu, Kitendawili na Usaliti (14:10–18) – Katika karamu ya harusi, Samsoni anatega kitendawili kwa wanaume thelathini; wanashindwa kukitegua na kumlazimisha bibi harusi awape siri yake.
Roho, Mauaji na Ndoa Iliyovunjika (14:19–20) – Roho anakuja tena; Samsoni anaua wanaume thelathini wa Ashkeloni ili alipe dau, kisha anawaacha, na mke wake anapewa rafiki yake.
Sura hii imefumwa kwa ustadi: siri ya simba na asali ndiyo msingi wa kitendawili; siri kati ya Samsoni na wazazi wake inafanana na siri kati yake na mke wake; tishio la Wafilisti la kumchoma mke na familia yake moto linatangulia kisasi cha moto wa sura ya 15 (Block, Judges, Ruth, 424–28; Webb, Book of Judges, 201–4).
3.0 Kutembea Ndani ya Maandishi — Tamaa, Simba, Kitendawili na Hasira
3.1 Waamuzi 14:1–4 — "Anapendeza Machoni Pangu" na "Lilikuwa Kutoka kwa Bwana"
"Samsoni akashuka mpaka Timna, akamwona huko mwanamke mmoja katika binti za Wafilisti. Basi akapanda kuwaambia babaye na mamaye, ‘Nimemwona mwanamke mmoja huko Timna, katika binti za Wafilisti; sasa, basi, mnipatie huyo ili awe mke wangu.’" (Waam 14:1–2)
Samsoni anaanza na macho yake na matakwa yake. Maneno ni mafupi na mazito: nimemwona … mnipatie. Wazazi wanamjibu kwa mantiki ya agano: "Je, hakuna mwanamke kati ya binti za ndugu zako… hata uende kutwaa mke katika hao Wafilisti wasiotahiriwa?" (Waam 14:3). Hawa si wabaguzi kwa sababu ya ubaguzi; wanajaribu kulinda utakatifu wa Israeli na uaminifu kwa Bwana (taz. Kum 7:3–4; Block, Judges, Ruth, 417–18).
Lakini Samsoni anasisitiza: "Mnipatie huyo; maana ananifaa machoni pangu" (Waam 14:3). Huu unasikika kama mwangwi wa hitimisho la kitabu: "kila mtu alifanya alichoona kuwa chema machoni pake" (Waam 21:25). Hapa tunaona Israeli katika mwili wa mtu mmoja: waliitwa kufanya kilicho chema machoni pa Bwana, lakini wanachagua kinachoonekana kizuri kwao wenyewe (Webb, Book of Judges, 197–98).
Kisha msimulizi anatuambia jambo la kushangaza:
"Lakini babaye na mamaye hawakujua ya kuwa jambo hilo lilitoka Bwana; kwa maana alikuwa anatafuta ya kujilipizia kisasa dhidi ya Wafilisti" (Waam 14:4).
Mungu anatumia hata shauku ya Samsoni iliyopinda kama fursa ya kuwapiga Wafilisti. Hii haimaanishi kuwa tamaa ya Samsoni ni takatifu; bali inaonyesha Mungu ambaye anaweza kutimiza makusudi yake hata katikati ya makosa ya watu. Ukuu wa Mungu unajisokota ndani ya udhaifu wa binadamu bila kuuhalalisha (Block, Judges, Ruth, 416–17; Wilcock, Message of Judges, 136–38).
3.2 Waamuzi 14:5–7 — Mwana-Simba na Roho Ajae kwa Nguvu
"Ndipo Samsoni alishuka, yeye na babaye na mamaye, mpaka Timna; wakafika mpaka mashamba ya mizabibu ya Timna" (Waam 14:5).
Yule Mnadhiri ambaye mama yake aliambiwa asinywe divai sasa anapita katikati ya mashamba ya mizabibu akielekea kumchukua binti wa Kifilisti (Waam 13:4; 14:5). Msimulizi anatunong’oneza: sasa tuko karibu na mipaka isiyoheshimiwa.
Ghafla, "simba mdogo akamrukia akitokea huko, akimuungurumia" (Waam 14:5). Maandiko yanasema kwa kifupi: "Roho wa Bwana akamjilia kwa nguvu, akamrarua yule simba kama vile mtu amraruavyo mwana-mbuzi, naye hakuwa na kitu mkononi mwake" (Waam 14:6). Nguvu zinakuja, hatari inatoweka, Mnadhiri anajiokoa kwa mikono mitupu (Block, Judges, Ruth, 424–26).
Lakini kuna sentensi fupi ya ajabu: "lakini hakuwapasha babaye wala mamaye aliyoyafanya" (Waam 14:6). Samsoni anabaki na siri. Ushindi aliopata kwa Roho unafichwa moyoni. Wito uliotangazwa waziwazi mbele ya malaika sasa unatembea kwa matendo ya siri asiyoshirikisha wengine.
3.3 Waamuzi 14:8–9 — Asali Ndani ya Mzoga na Unajisi Kimya Kimya
"Baada ya muda" anaporudi kumchukua bibi harusi wake, Samsoni "akageuka pembeni ili auone mzoga wa yule simba" (Waam 14:8). Ndani ya mwili wa yule mzoga anakuta sega la nyuki na asali. Ananyosha mkono, anachota asali, anakula njiani, kisha anawapa hata wazazi wake—bila kuwaeleza imetoka wapi (Waam 14:9).
Mnadhiri alitakiwa kuepukana na maiti (Hes 6:6–7). Hapa, Samsoni si tu anagusa mnyama aliyemrarua, bali anakula kutoka kwenye mzoga na kuwashirikisha wazazi wake bila wao kujua. Utamu unatoka kwenye mauti; raha inafurahiwa kutoka kwenye uchafu; na wengine wanalishwa kutoka chanzo hicho hicho bila kufahamishwa (Block, Judges, Ruth, 425–26).
Kwa upande wa simulizi, tukio hili linaweka mazingira kwa ajili ya kitendawili kile maarufu anachouliza baadaye. Lakini kwenye ngazi ya maadili au tabia, inaonesha jinsi kuwekwa wakfu kwake (consecration) tayari kunaanza kudhoofika.. Samsoni anajiona mwenye nguvu zisizoweza kushindwa (hazibadiliki; mipaka ya utakatifu kwake inaonekana kama kitu kinachoweza kujadilika au kubadilishwa (Wilcock, Message of Judges, 138–39).
3.4 Waamuzi 14:10–14 — Karamu, Marafiki Thelathini na Kitendawili Kigumu
Babaye Samsoni anamshukia yule mwanamke, na Samsoni anaandaa huko "karamu; maana ndivyo vijana walivyokuwa wakifanya" (Waam 14:10). Wafilisti wanamletea wanaume thelathini kuwa kama marafiki au walinzi. Kwenye kundi hilo mchanganyiko, Samsoni anaweka dau: wakitegua kitendawili chake siku saba za sherehe, atawapa kila mmoja joho na nguo nyingine; wakishindwa, wao wamlipe yeye (Waam 14:12–13).
Kitendawili chenyewe kinapendeza lakini kinaficha mambo mengi:
"Ndani ya mlaji,kulitoka kitu cha kuliwa;Ndani ya mwenye nguvu,kulitoka kitu kitamu." (Waam 14:14).
Kimejengwa juu ya tukio la simba na asali. Kwa lugha nyingine, haiwezekani kukitegua kwa njia ya haki; ni wale tu wanaojua siri ya Samsoni wanaoweza kukijibu. Hapa tunaona nguvu zake, usiri wake, na kupenda kwake hatari zote zinawekwa wazi na kuonekana (Block, Judges, Ruth, 426–27; Webb, Book of Judges, 201–2).
3.5 Waamuzi 14:15–18 — Vitisho, Machozi na Siri Iliyosalitiwa
Siku ya nne, wanaume wanajikuta wamekwama. Wanamgeukia bibi harusi wa Samsoni:
"Mdanganye mumeo, utuambie siri ya kitendawili hicho, la sivyo tutakuchoma moto wewe na nyumba ya babako" (taz. Waam 14:15).
Anabaki katikati ya moto: upande mmoja mume mpya, upande mwingine watu wa kwao waliotishia kumteketeza. Analia, anamwambia Samsoni: "Wewe wanichukia wala hunipendi; maana umewaambia watu wangu kitendawili, wala hukuambia mimi" (Waam 14:16).
Samsoni anajitetea: hata wazazi wake hajawaambia. Lakini "alilia mbele yake siku zote saba" za sherehe, na mwisho "siku ya saba akamwambia; kwa kuwa alimwingilia kwa maneno" (Waam 14:17). Naye mara moja anawaambia watu wake.
Kabla jua halijazama siku ya saba, wanaume wa mji wanamletea jibu lao la kishairi:
"Ni kitu gani kilicho tamu kuliko asali?Ni nini kilicho hodari kuliko simba?" (Waam 14:18).
Samsoni anajua papo hapo kilichotokea: "Kama hamngalilima na ndama wangu, msingalijua kitendawili changu" (Waam 14:18). Methali yake inafunua hasira yake na jinsi anavyomwona mke wake kama mali tu. Hatupi jina la mwanamke huyu; machozi na hofu yake vinazimwa na mgongano kati ya Samsoni na Wafilisti (Webb, Book of Judges, 202–3).
3.6 Waamuzi 14:19–20 — Roho, Mauaji na Ndoa Iliyovunjika
Sura inahitimishwa na kuja tena kwa Roho na mlipuko mpya wa hasira:
"Roho wa Bwana akamjilia kwa nguvu, akashuka mpaka Ashkeloni, akapiga watu thelathini katika mji, akatwaa nyara zao, akawapa wale walioteua ile mafumbo mafuo" (Waam 14:19).
Nguvu ya Samsoni inajulikana tena kuwa yatoka kwa Bwana, lakini msukumo wa karibu zaidi ni hasira binafsi na kulipa dau la kamari. Kusudi la Mungu la "kutafuta sababu juu ya Wafilisti" (Waam 14:4) linaendelea, lakini kupitia moyo uliokunjamana na damu inayomwagika (Block, Judges, Ruth, 432–34).
Mstari wa mwisho ni wa uchungu: "Mkewe Samsoni akapewa rafikiye, yule aliyekuwa rafiki wa bwana harusi" (Waam 14:20). Kilichoanza kwa "anapendeza machoni pangu" kinamalizika kwa kuachwa na kusalitiwa. Sura ya 15 inajengeka juu ya majeraha haya (Wilcock, Message of Judges, 139–40).
4.0 Tafakari ya Kiroho — Kusudi la Mungu na Tamaa za Samsoni
4.1 "Anapendeza Machoni Pangu" — Samsoni kama Israeli Aliye katika Mwili
Kudai kwa Samsoni kwamba msichana wa Timna "anapendeza machoni pake" kunafunua ugonjwa wa kiroho wa kizazi kile. Israeli waliitwa kufanya lililo jema machoni pa Bwana (Kum 12:28), lakini kitabu cha Waamuzi kimezungukwa na kauli tofauti: kila mtu akifanya aliloona kuwa jema machoni pake (Waam 17:6; 21:25).
Samsoni anakusanya ugonjwa huo ndani ya nafsi yake. Amepewa nguvu za ajabu na wito wa kipekee, lakini anachagua mahusiano, maeneo na tabia zinazotokana na kuona kwa macho, si kusikia sauti ya agano. Maisha yake yanatuonya: haki ya kiroho na karama kubwa hazimaanishi moja kwa moja hekima ya kiroho (Webb, Book of Judges, 197–99).
4.2 "Lilikuwa Kutoka kwa Bwana" — Ukuu wa Mungu Bila Kuunga Mkono Dhambi
Sentensi ya msimulizi "jambo hilo lilimtoka Bwana" (Waam 14:4) ni muhimu sana. Mungu hafungwi na maamuzi mabaya ya Samsoni. Anaweza hata kutumia safari ya ndoa iliyopinda kama nafasi ya kuwakabili Wafilisti. Kama ilivyokuwa kwa ndugu zake Yosefu (Mwa 50:20), wao wanakusudia kwa uovu, lakini Mungu anageuza kwa mema.
Lakini ukuu wa Mungu haugeuzi tamaa za Samsoni kuwa sahihi. Maandiko hayamsifu Samsoni kwa kutaka mke wa Kifilisti; yanatuonyesha tu kwamba Mungu anaweza kutenda hata kupitia mioyo iliyochanganyikana. Mvutano huo unaendelea katika simulizi lote la Samsoni: Mungu anamgeuza kuwa chombo chake, lakini maisha yake yanabaki kuwa yenye utata wa kimaadili (Block, Judges, Ruth, 416–18; Wilcock, Message of Judges, 136–38).
4.3 Asali Kwenye Mzoga — Utamu na Mipaka Inayovunjika
Picha ya asali ndani ya mzoga wa simba haisahauliki. Inakuwa kitendawili cha Samsoni, lakini pia ni ishara ya rohoni. Wakati mwingine utamu unapatikana kwenye maeneo ya kifo. Tunaweza kupata raha kutoka vitu ambavyo kiini chake ni uchafu au uharibifu—na hata kuwalisha wengine kutoka humo bila kuwaambia ukweli (Webb, Book of Judges, 201–3).
Upako wa Unadhiri wa Samsoni unakaanza kukaukia kimya kimya muda mrefu kabla hata hatujamuona Delila. Anatembea karibu na mizabibu, anagusa mzoga, anasherehekea na Wafilisti, anacheza na siri. Sura hii inatukumbusha kuwa wito unaweza kukatizwa, si tu kwa anguko moja kubwa, bali kwa kuvuka mipaka mara kwa mara, kidogo kidogo (Block, Judges, Ruth, 424–27; Wilcock, Message of Judges, 138–40).
4.4 Roho na Hasira — Karama Bila Matunda
Mara mbili katika sura hii Roho wa Bwana "anamjia kwa nguvu" (Waam 14:6, 19). Katika Waamuzi, kazi ya Roho mara nyingi ni kuwapa viongozi uwezo wa kupambana na watesi. Hapa Roho anampa Samsoni nguvu za mwili, si upole au ukomavu wa ndani (Block, Judges, Ruth, 424–26, 432–34).
Simulizi la Samsoni linatuonya tusichanganye nguvu ya kiroho na afya ya kiroho. Mtu anaweza kutumiwa na Mungu kwa njia ya ajabu, lakini bado akawa anapambana na tamaa, kiburi na hasira. Agano Jipya linatukumbusha si tu zawadi za Roho, bali pia matunda ya Roho (Gal 5:22–23). Nguvu bila tabia inaweza kuleta uharibifu mkubwa sana, hata wakati Mungu, kwa rehema zake, bado anaendeleza au anatimiza makusudi yake. (Wilcock, Message of Judges, 140–41).
5.0 Matumizi kwa Maisha — Nguvu, Tamaa na Njia ya Msalaba
5.1 Kulinda Macho Yetu na Maamuzi Yetu
Kauli ya Samsoni, "anapendeza machoni pangu", inagusa maamuzi yetu sisi wenyewe. Mara nyingi tunaamua kuhusu mahusiano, kazi, fedha au huduma kwa yale tu yanayoonekana vizuri mbele ya macho yetu, bila kuuliza, "Lakini Bwana anapendelea nini?"
Tunaalikwa tusimame kwenye "njia panda za Timna" za maisha yetu na tujiulize:
Ni nini kinachosukuma tamaa yangu hapa—Neno la Mungu, au shinikizo la utamaduni na matamanio ya ndani?
Uamuzi huu utaathiri vipi utakatifu wangu na utofauti wangu kama mtu aliyewekwa wakfu kwa Kristo? (taz. Rum 12:1–2).
5.2 Kuchunguza Chanzo cha Utamu Wetu
Tukio la asali ndani ya mzoga linatutafakarisha swali la ndani: Utamu ninaotafuta maishani unatoka wapi?
Je, kuna burudani, tabia au mahusiano yanayonipa raha, lakini kiini chake ni uharibifu wa kiroho?
Je, ninawalisha wengine kutoka maeneo ambayo moyoni najua yamechafuliwa, bila kuwaambia ukweli?
Neema ya Mungu haitufanyi tusiguswe na uchafu; inatuita tuwe wa kweli na watubuo, tukileta vyanzo vyetu vya "utamu" mbele za nuru ya Kristo (1 Yoh 1:5–9).
5.3 Kuona Wanaobanwa Katikati
Bibi harusi wa Samsoni ananaswa katikati ya nguvu mbili: tishio la watu wake na presha ya mume wake. Machozi yake yanatukumbusha kwamba mara nyingi kwenye migogoro ya wenye nguvu, wapo walio dhaifu waliokwama katikati.
Kama makanisa na jamii za waumini, tunaitwa kuwaona na kuwalinda watu kama hawa; si kuwafanya chambo au zana ya mashindano. Kanisa linapaswa kuwa mahali ambapo vitisho na shuruti zinatajwa wazi na kupingwa, si kuigwa (Yak 1:27).
5.4 Kuweka Hasira Yetu Chini ya Utawala wa Roho
Mauaji ya Samsoni huko Ashkeloni yanaonyesha nini hutokea nguvu za Roho zinapokutana na hasira binafsi. Wengi wetu tunajua jaribu la kutumia vipawa vyetu—mahubiri, uongozi, ubunifu, ushawishi—kulipa kisasi au kujithibitisha.
Yesu anatuita kupita njia nyingine: kuleta hasira, majeraha na kiu ya kulipiza mbele ya msalaba, tukimruhusu Roho Mtakatifu asitupe tu uwezo wa kufanya kazi, bali atutakase ndani (Efe 4:26–32).
Maswali ya Tafakari
Unatambua wapi katika maisha yako muundo wa "anapendeza machoni pangu"—hasa kwenye mahusiano au maamuzi makubwa?
Je, kuna "asali kutoka kwenye mzoga" katika maisha yako—vyanzo vya utamu ambavyo kwa kweli vinatokana na mambo yaliyokufa kiroho?
Umeshuhudiaje Mungu akifanya kazi kupitia wewe hata wakati nia zako hazikuwa safi (mixed motives) au tabia yako ilikuwa bado haijakomaa? Ulijifunza nini kutokana na mvutano huo?
Ni nani leo katika mazingira yako anaweza kufanana na bibi harusi wa Samsoni—aliye kati ya shinikizo, na kutishwa na wenye nguvu? Unawezaje kusimama upande wake?
Kivitendo, ingeonekanaje wiki hii kuleta hasira zako na kiu ya kulipiza chini ya utawala wa Roho wa Mungu?
Sala ya Kujibu
Bwana wa nguvu na rehema,
Wewe wajua barabara ambako tamaa zetu hutuvuta, ambapo macho yetu yanashikamana na kile kinachoonekana chema, wakati hekima yako inaita njia nyingine.
Waona pia simba wanaonguruma mbele ya njia zetu, na mizoga tunayogusa kwa siri ili tuonje asali isiyoruhusiwa.
Utuhurumie, ee Bwana.
Asante kwamba wewe hushindwi na kuchanganyikiwa kwetu na udhaifu wetu, kwamba makusudi yako ni makubwa kuliko kushindwa kwetu, na kwamba waweza kufanya kazi hata kupitia nia zilizopinda ili kuangusha kile kinachowatesa watu wako.
Lakini usituache turidhike kuwa vyombo vinavyotumika bila kuwa watakatifu.
Kwa Roho wako, ufundishe macho yetu kupenda yale unayopenda. Ulinde miguu yetu isishuke kwenye njia zinazotuondolea uwakfu wetu. Fumbua maeneo tunayovuta utamu kutoka kwenye kifo, utulete kwenye toba ya kweli.
Pale tulipotumia vipawa vyako kutumikia hasira zetu, tusamehe na tutakase. Umba ndani yetu si nguvu tu, bali pia matunda ya Roho wako: upendo, furaha, amani, uvumilivu, wema, upole na kiasi.
Tunamtazama Yesu, Aliye Mwenye Nguvu Kweli, aliyekutana na simba wa mauti na kumgeuza kuwa kaburi tupu, aliyetoa uhai wake badala ya kuutoa wa wengine, aliyefanya si kilichoonekana chema machoni pake, bali kilicho chema machoni pako.
Katika jina lake tunaomba. Amina.
Mtazamo wa Sura Inayofuata
Katika sura inayofuata, hasira na majeraha yanawaka na kugeuka mgogoro wa wazi:
Waamuzi 15 — Mbweha, Taya ya Punda na Shamba Linalowaka Moto.
Tutaona jinsi kisasi cha mtu mmoja kinavyogusa taifa zima, na tutauliza, maana yake nini kuishi kama wapatanishi katika dunia inayopenda kushika "taya za punda" za kulipiza kisasi.
Bibliografia
Block, Daniel I. Judges, Ruth. New American Commentary 6. Nashville: Broadman & Holman, 1999.
Webb, Barry G. The Book of Judges: An Integrated Reading. Journal for the Study of the Old Testament Supplement Series 46. Sheffield: JSOT Press, 1987.
Wilcock, Michael. The Message of Judges: Grace Abounding. The Bible Speaks Today. Downers Grove, IL: InterVarsity, 1992.
Comments